Pader Johannes Hermanus Gijsbertus Bouman a nace dia 4 di juli 1929 na Schiedam y ta keda ordena sacerdote dia 25 di juli 1959 na Nijmegen y a celebra su prome misa dia 16 di augustus 1959 na Kethel y a yega na Antia Hulandes 6 di september 1961.
Despues di tawata algun tempo na Oranjestad, Aruba, a mand’e Bonaire cuater aña. Na aña 1971 el a bira e prome Pastoor y fundado di Parokia Cristo Bon Wardador na Koraal Spech, cuminsando celebrando misa na cas di Johanes Jacobus Ferdinandus y Migala Candelaria Ferdinandus-Antonia na Caya Pilon 11 y despues a pasa pa cura di School Dr Da Costa Gomez. Cu esfuersonan grandi a logra di construi e edificio di misa cu a inaugura na aña 1974 bou di un palo di awasero. Den e mesun periodo el a traha como aalmoezenier di prizon.
Di aña 1977 te cu 1985 e tabata Pastoor na Parokia Cristo Rey na Brasil. Despues cu Pastoor Kustner a fayece na Hulanda, Bouwman hunto cu otronan – manera Pastoor Nico Pasadilla, Pader Karel Berlage y Pader Jaques vd Lee, Padre Parra (Sacerdote di Colombia) y tambe Pader W Driessen – tabata haci misa na Dakota. Esey a sosode den e periodo di september 1984 te cu maart, 1985. Y hustamente den e periodo ey, riba un 8 di december, e mucha homber Jairo Maduro a cuminsa sirbi misa den su bario di Dakota.
Na final a nombra Pader Bouwman como Pastoor di Dakota na unda el a traha for di januari, 1991 te cu juli di aña 1999.
Pa tur su trabounan grandioso realisa den e Obispado y tambe ariba Aruba el a keda condecora pa Gobernador Felipito Tromp como Ridder in de Orde van Oranje Nassau. Aunke esnan cu conoce Pader Bouwman, e lo bisa cu esey no tawata necesario pasobra e tawata consciente pa ken e tawata gasta su bida, esta pa Dios mes.
Despues di añanan fantastico na Parokia di Dakota na 1999 el a sali di Parokia La Birgen di Fatima pa Centro Pastoral, pero no pa descansa, sino entregando su mes den e tarea special pa bida di famia, esta e tabata encarga cu e programanan Encuentro Conyugal, Encuentro Hijos y Hijas, Warda na Hospital, direccion spiritual, confesion y su famoso boekhandel hunto cu Zr Clarina Dirkz, kende tambe ta na Hulanda.
Finalmente mara na obediencia e mester a regresa Hulanda, sigur un Hulanda totalmente diferente pa biba den convento di Soeurnan di Voorschoten na Hulanda.
E conexion di Pastoor Jairo cu Pader Bouwman
Pastoor Jairo Maduro semper tabatin un respet y admiracion pa Pader Bouwman. Y e mes ta conta esaki. “Na prome luga si awe mi a logra di responde Dios manera mester ta den algo cu a parce imposibel pa hopi y incluso pa algun sacerdote ta danki na Pader Jan Bouman y tambe Mgr Willem Michael Ellis dfm. Nan tawata e combo di forsa pa cual despues mi a haya como formadonan Pader Rudy Josepha O.P. dfm Pastoor di Steenrijk y despues Pastoor Carlos Donado di Pietermaai y na parti final di mi formacion, siendo diacono, tawata Pastoor Rey Nares na Playa, Pastoor Alfons Baak na Santa Maria na Curacao, Mgr Jorge Camilo Cuenca Dfm na Parokia La Caridad Del Cobre na Caracas y finalmente Mgr Jose Hernan Sanchez Porras Dfm, Obispo Castrense di Venezuela.
Mi a conoce Pader Bouman prome cu el a bira Pastoor mes na Dakota. Un homber cu un spiritualidad hopi accentua, pero tambe hopi cercano. Su prome bish*ta na mi cas siendo habitante nobo na Dakota (Papayastraat 10) el a combersa cu mi mama y mi ta corda cu el a bisa mi cu mi tin ”Un curason di Oro” Den mi mes mi di “ta di unda” pasobra cu un edad di 15 aña bo no ta mucho bon mucha enfin! Kico e homber di Dios ey a mira den mi? Mi ta kere un bon gordura pa tira e simia di “Vocacion”. Mi a sigui sirbi misa y un amistad a cuminsa crece y poco poco el a bira un figura di un tata spiritual.
Den e trayectorio di un mucha di mi edad jong mi mester a lucha cu hopi situacion pa busca unda mi kier ta para. Siendo un hoben di e tempo ey y mas ainda manifestando mi deseo pa bira sacerdote y hayando un “NO” di algun sacerdote, dado momento bo kier pensa ariba otro cos pa haci den bida. E “NO” radical tawata mara na e parti academico ya cu mi tawata bay Jhon F Kennedy L.T.S y e asunto mester ta H.A.V.O…(Mi ta gradici Dios cu mi a bay L.T.S te cu awe, pasobra dos man links mi no tin).
Pader Bouman despues cu el a bin Dakota semper e tawata kier a mira mi ta sirbi misa tur dia. Si mi falta un dia lo mi tende: “MI A HAYA BO FALTA MASHA AYERA” di forma diplomatico e ta bisa mi “ Ta na unda bo a keda ayera?”
Asina mi a pasa mi añanan ta observa su bida como sacerdote, y su amabilidad, su caracter trankil, pero semper kier mira tur cos cana bon, su bida spiritual hopi profundo y su manera di sirbi Dios sin keha, sin cansa a yama profundamente mi atencion.
E homber di Dios aki a logra mira den mi, loke hopi y tambe mi mes no a logra mira den mi den añanan di mi hubentud. Mi no ta corda e fecha cu mi a bis’e cu mi kier bira sacerdote, pero si mi ta corda su contesta “Bo mester reza hopi”. E no a manda mi bay HAVO, e no a duna mi un buki di mas di 100 pagina pa lesa, pero si el a manda mi di bira un hende di hopi oracion.
Den transcurso di añanan e soño di bira sacerdote a cuminsa debilita, ya cu mi a cuminsa traha na UNICON y despues mi a bay solicita na K.I.A. como gevangenisbewaarde. Mi mester a busca un futuro stabiel y ta net cu K.I.A a habri e prizon nobo na Santo di Patia. Mi a bay entrevista y tawata cla pa cuminsa e curso. Pero ariba un diadomingo anochi, mi no ta corda e fecha, Pader Bouman a bati na mi porta di cas, mi a habri porta ata “the man himself” para mi dilanti. Su palabranan tawata “Jairo prepara bo pasobra otro siman bo ta bay Corsou” Mi por corda cu mi a keda babuca, tur plannan a paralisa, mi a bis’e cu e bay pastorie mi ta bini ey nos papia.
Wel! E cos tawata serio. Den un siman mester a bisa “ayo” na tur plan, mas ainda mi tawata den mi momento cu mi tawata gusta. Trahando, cobrando, tocando den Orkesta Harmonica Aruba, tambe den Academy Brass Band ademas mi tawatin 20 aña di edad. Tur cos a cambia. Mi ta kere esey tawata e momento cu mi a bisa e “SI” definitivo, e si cu Dios tawata kier a scucha. Un “si” cu a anula masha hopi cos pasahero den mi bida.
Despues di bay pastorie a combersa e asunto, mi a comprende cu esaki tawata mi momento di duna Dios un contesta. Yegando cas, mi a comenta e asunto na mi mama “Mama mi mester bay Corsou pa studia pa bira pader” Te awe mi ta warda un “O.K. ta bon of un si”.”
E ultimo bish*ta cu Pastoor Jairo a haci na dje su mensahe semper tabata: Reza hopi.
Cu Pader Bouwman sosega na paz.
Filosofia di bida di Pader Bouwman den su ultimo mensahe
Pader Jan Bouwman dialuna a bay cerca su Creador. Den un di su ultimo combersacion cu Pastoor Jairo el a manda un mensahe di filosofia di con bida ta den cada fase. El a biba gran parti di su bida na Aruba y na final el a bay biba bek na Hulanda.
