‹›
Posted on 07/26/2024 9:48 am AST | Updated on 07/26/2024 9:51 am AST
ORANJESTAD -Asociacion di Baseball di Merca,(MLB)Major League Baseball ta organisando pa prome biaha e MLB Camp na Aruba. Durante e camp, muchanan di diferente edad ta bay tin e oportunidad di hunga baseball cu hungadornan profesional invita door di MLB.
Participacion den e camp ta completamente gratis. Manera organisador di e evento, Neely Cosentino a informa, “MLB ta mira e potencial di gran talento na Aruba,” y pa e motibo aki a dicidi di patrocina y organisa e bunita camp aki pa muchanan di Aruba.
Durante e camp, e muchanan ta bay tin e oportunidad pa hunga baseball cu Calvin Maduro, Sidney Ponson, Wladimir ‘Coco’ Valentin, Andrelton Simmons y Desi Relaford.
Diahuebs 25 di juli, muchanan di 6 pa 12 aña di edad por asisti na e evento na Stadion Nadi Croes/Crismo Angela. Diabierna 26 di juli, muchanan di 7 pa 13 aña por participa na Joe Laveist Ball Park na San Nicolas. E camp ta tuma lugar di 6pm pa 9pm.
Pa registra: por yama Neely Cosentino na 5937149 of manda un e-mail na [emailprotected].
Sra. Cosentino a informa cu pa e grupo di 6-12 aña tin apenas algun cupo ainda disponible, pues inscribi lo mas pronto posible!
WORKSHOP
Ademas, ta bay tin un oportunidad unico pa coach y mayornan di mucha cu ta hunga baseball, esta un workshop cu un psicologo deportivo. Tuma nota cu e workshop aki ta solamente pa adulto.
Esaki ta bay ta diasabra dia 27 di juli na e Ballroom di Eagle Resort, di 1pm pa 4 pm.
Psicologo deportivo Dr. Omar Figueroa, kende ta un consultant lider den prestacion mental pa atletanan profesional den NFL, NBA, MLB y MLS, y mas recientemente e Chief of Staff pa e Washington Commanders den NFL, ta bay duna un tayer pa haya sa e secretonan pa logra un prestacion extraordinario door di domina e habilidadnan mental usa pa e atleta y ehecutivonan top na mundo.
E MLB Aruba Workshop ta bay ta un tayer interactivo cu ta bay duna esnan presente e hermentnan y strategianan practico pa eleva nan prestacion. Den e tayer ta bay explora seis habilidad mental fundacional cu consistentemente ta haci un diferencia na e nivelnan mas halto di prestacion. Door di participa den discusion, actividadnan hands-on y ehempelnan di mundo real, esnan presenta ta bay haya sa con pa aplica e habilidadnan aki pa nan propio propositonan, sigurando cu nan ta bon prepara pa ta excelente den nan bida tanto profesional como personal.
MOTIVACION
Imagina subi e plato, base yen, cu e wega den linea. Ta bo motivacion interno cu ta mantene bo enfoca y determina pa duna bo miho bateo. Den e workshop ta bay profundisa riba e tecnicanan pa impulsa y sostene bo empuhe, sigurando cu bo por pusha hasta door di e retonan mas dificil riba y fuera di e campo.
PREPARACION
Pensa riba bo mes como un pitcher preparando pa un wega crucial, bayendo door di warm-up meticuloso y rutinanan mental pa sigura cu tur cos ta na ordo. Similarmente, preparacion mental ta involucra prepara bo mes mental- y fisicamente pa e miho prestacion. Den e workshop ta bay explora strategia pa yuda bo ta cla pa cualkier situacion, sigurando cu bo semper ta duna bo bes.
CONFIANSA
Considera bo mes para riba e outfield, e bala biniendo den bo direccion, y e publico cu rosea wanta. Bo confiansa den bo habilidadnan ta loke ta permiti bo pa haci e catch pa por gana e wega. E workshop ta bay discuti metodonan proba pa construi creencia den bo mes, pa bo por acerca cada tarea cu confiansa.
MENTALIDAD
Imagina bo mes como un atleta cu ta mira cada strikeout como un oportunidad pa siña, constantemente mehorando bo wega. Un mentalidad di crecemento ta transforma obstaculo den oportunidad. E workshop ta bay yuda bo desaroya e mentalidad aki, permitiendo bo acepta reto y mira obstaculo como un caminda pa crecemento.
CONSISTENCIA
Visualisa practicando bo postura pa bateo dia aden dia afo, bao solo of den awasero, pa perfecciona bo bateo. Consistencia den practica y rutina ta clave pa mantene prestacion halto. E tayer ta bay examina con pa crea y mantene habitonan cu ta sostene bo metanan, yudando bo keda dedica y enfoca.
REGULACION EMOCIONAL
Imagina bo mes riba e mound na fin di e di nuebe inning, kedando trankil y enfoca a pesar di tur loke tin den wega. E habilidad pa maneha emocion bao presion ta sigura claridad y un toma di decision efectivo. E tayer ta bay siña tecnica pa yuda bo regula bo emocion, manteniendo bo compostura den cualkier situacion.
Mester remarca un biaha mas cu e tayer aki ta pa mayor- y coachnan, pues solamente pa adulto.
Pa registra: por yama Neely Cosentino na 5937149 of manda un e-mail na [emailprotected]. NOTA: Texto cortesia di Bon Dia Aruba.
